ஆசிரியராக இருந்து சபாநாயகராக உயர்ந்தவர்: அப்பாவுக்கு அனைத்து கட்சி உறுப்பினர்கள் பாராட்டு

சென்னை: ஆசிரியராக இருந்து கடின உழைப்பால் இன்று சபாநாயகர் பதவிக்கு உயர்ந்தவர் அப்பாவு என்று அனைத்து கட்சி உறுப்பினர்கள் பாராட்டி பேசினர். தமிழக சட்டப் பேரவையில், சபாநாயகர் அப்பாவும், துணை சபாநாயகராக பிச்சாண்டியும் பதவி ஏற்றுக் கொண்டனர். அவர்களை வாழ்த்தி அனைத்து கட்சிகளை சேர்ந்த உறுப்பினர்கள் பேசினர். பிரின்ஸ்(காங்கிரஸ்): சட்டமன்ற தொகுதி மக்களின் குரலை சட்டமன்ற உறுப்பினர் வாயிலாக இந்த அவையில் ஒலிக்க செய்து, முதல்வர் மற்றும் அமைச்சர்களிடம் இருந்து தக்க பதிலை பெற்று தருவது என்பது மிக முக்கியம். இந்த பொறுப்பை தாங்கள் அற்புதமாக செய்வீர்கள் என்று ஆளுங்கட்சி, எதிர்கட்சியும், நாங்களும் எதிர்பார்க்கிறோம்.

ஜி.கே.மணி(பாமக): அரசியலுக்கு வருவதற்கு முன்பு நீங்கள் ஒரு ஆசிரியர். எனவே ஆசிரியராக பணியை தொடர்ந்து, அரசியலில் காமராஜர் மீது பற்று கொண்டு அங்கும் தடம் பதித்து உங்கள் கடின உழைப்பால் இன்று சபாநாயகராக பொறுப்பேற்றிருப்பது எங்களுக்கெல்லாம் மகிழ்ச்சி. நயினார் நாகேந்திரன்(பாஜக): ஒரு கட்சியில் எத்தனை உறுப்பினர்கள் இருக்கிறார்கள் என்பதை பார்க்காமல் எண்ணங்களின் அடிப்படையில் சட்டமன்ற உறுப்பினர்களுக்கு நேரம் ஒதுக்க வேண்டும் என்றும், நியாயத்தின் அடிப்படையில் உங்கள் தீர்ப்புகள் இருக்க வேண்டும் என்றும் கேட்டுக் கொள்கிறேன்.

Facebook Comments Box
Author: sivapriya